ဆုပန်ထွာက ဒါရိုက်တာ မိုက်တီး ရိုက်ကူးတဲ့ ဒီဗီဒီဇာတ်ကားမှာ သရုပ်ဆောင်ဖို့ အတွက် အောက်တိုဘာ ၁ဝ ရက်က ဘန်ကောက်ကို သွားပါတယ်။ ဒီဇာတ်ကားမှာ ဆုပန်ထွာက ကုမ္ပဏီတစ်ခုကနေ ဘန်ကောက် ကိုသွားဖို့ ကံစမ်းမဲ ဖောက်တဲ့ သူတွေကို ဦးဆောင်ခေါ်သွားသူအဖြစ် သရုပ်ဆောင်မှာ ဖြစ်ပါတယ်။ ဘန်ကောက် မှာ ဝတ်ဖို့ အဝတ်အစားအတွက် ဒီဇိုင်နာနဲ့ တိုင်ပင်ပြီး ချုပ်ထားတယ်လို့ ပြောတဲ့ ဆုပန်ထွာက ”အဝတ်အစား ကို ဒီဇိုင်နာ မပုံ့နဲ့ အပ်ထားတယ်။ အားလုံးထဲ မှာ ဖန်စီဝတ်လို့ သိပ်အဆင်မပြေဘူး။ အားလုံးရဲ့ ခေါင်းဆောင် လုပ်ရမယ်၊ အဖွဲ့ကို ထိန်းပြီးသွားရမယ့် တာဝန်ခံအနေ နဲ့လိုက်ရမှာ ဆိုတော့ အင်္ကျီလှလှလေးတွေ ဝတ်ဖို့ စဉ်းစားထားပါ တယ်”လို့ ပြောပါတယ်။ဆုပန်ထွာရဲ့ မွေးနေ့က အောက်တိုဘာ ၂၁ ရက်နေ့ ဖြစ်ပါတယ်။ ဘန်ကောက်က ပြန်ရောက်တာနဲ့ ဒါရိုက်တာ ဝင်းထွန်းထွန်း ရိုက်မယ့် ဇာတ်ကား အတွက် ချောင်းသာကို တန်းသွားရမှာ ဖြစ်တဲ့အတွက် မွေးနေ့ကိုတော့ ရိုက်ကွင်းပေါ်မှာပဲ ဖြတ်သန်းဖြစ်မှာပါ။ မွေးနေ့ အလှူအဖြစ် နာရေးကူညီမှု အသင်းကိုလှူဖို့ စီစဉ်ထားပြီး ချောင်းသာက ပြန်လာမှပဲ လှူဖြစ်မှာပါ။ နာရေးကူညီမှု အသင်း(ရန်ကုန်) မှာ လှူဖြစ်ရတဲ့ အကြောင်းပြောတဲ့ ဆုပန်ထွာက ”သေသွားတဲ့ လူတွေအပေါ်မှာ မပန် တာဝန် မကျေတာတွေ သိပ်များနေပြီ။ လူတွေကို ဒီအတိုင်းဆို မပန်မကြောက်ဘူး။ သေပြီဆို မပန် တအားကြောက်တာ။ မပန်အဖေ သေတုန်းကတောင် မပန် အနားမကပ်ဘူး။ ကိုယ့်ဘက်က တာဝန်မကျေဘူး ထင်ခဲ့လို့ ခုလို လှူ ဖြစ်မှာပါ။ စိတ်ထဲမှာ ဖြစ်နေတာကတော့ နာရေးကူညီမှု အသင်းကို လှူချင်နေတယ်”လို့ ပြောပြပါတယ်။
ဆုပန်ထွာက နိုဝင်ဘာမှာ မလေးရှားကို သီချင်းဆိုဖို့ သွားမှာဖြစ်ပြီး သူမရဲ့ တစ်ကိုယ်တော် အခွေထဲက သီချင်းတွေပဲ သီဆိုမှာပါ။ နိုဝင်ဘာလ ကုန်ရင်တော့ သူမရဲ့ ‘မတည့်အတူနေ’ ဗီစီဒီ ထွက်မှာဖြစ်ပြီး ဆွစ်ဇာလန်မှာ ကိုယ်တိုင် ရိုက်ခဲ့တဲ့ သီချင်းကို ဒါရိုက်တာ ဆုပန်ထွာ လို့ တပ်မှာ ဖြစ်တဲ့အတွက် လန့်နေမိတယ်လို့ ပြောပါတယ်။ ”ဆွစ်ဇာလန်မှာ ရိုက်လာတဲ့ သီချင်းအတွက်တော့ မပန်ကိုယ်တိုင် တည်းဖြတ်မှ ရမှာလေ။ ဒါရိုက်တာ နာမည်တပ်မှာဆိုတော့ အဲဒါကိုလည်း ကြောက်တယ်။ တကယ့် ဒါရိုက်တာ မဟုတ်တဲ့ အခါကျတော့ ရိုက်ခဲ့လို့သာ ကိုယ့်နာမည် တပ်ရမှာ၊ အမှန်တကယ် တော့ မပန် မတပ်ချင်ဘူး။ ကိုယ့်မှာ ဒါရိုက်တာ အရည်အချင်းလည်း မရှိသေးပါ ဘူး။ ဒါပေမဲ့ မပန်လည်း ကြိုးစားပြီးရိုက်ခဲ့တာပါ” လို့ ဒါရိုက်တာ နာမည်တပ်ဖြစ်ပုံကိုလည်း ရှင်းပြခဲ့ပါတယ်။
ခိုင်ဝေလွင်
0 ဦးမှတ်ချက်ပြုပါသည်။:
Post a Comment
ကျေးဇူးဆိုတဲ့စကားလေးက အားဆေးလေးတစ်ခွက်ပါ။